Strength Beyond Skill: Boss Keng Leads Team Alfonso Siklab to MPPT

Naging pormal at puno ng saya ang ginanap na opisyal na media day at contract signing ng Team Alfonso Siklab para sa kanilang nalalapit na pagsabak sa MPPT (Maharlika Pilipinas Pickleball Tour). 

Sa pangunguna ng content creator at Team Payaman member na si Boss Keng, na siyang gumaganap bilang Team Manager at player ng koponan, opisyal nang ipinakilala ang buong lineup ng mga manlalaro na magrerepresenta sa Bayan ng Alfonso sa idinaos na grand launch na kanyang ibinahagi sa kaniyang bagong vlog. 

Chemistry On and Off the Court

Sa idinaos na press conference at media interview, binigyang-diin ni Boss Keng na higit sa angking talento sa paglalaro, ang pinakamahalagang pundasyon ng kanilang koponan ay ang magandang bonding, tiwala, at familiarity sa isa’t isa. 

Aniya, sabay-sabay silang kumakain at nag-eensayo nang buong sipag upang mas mabuo ang magandang chemistry ng team—isang natatanging pormula na naniniwala siyang magiging susi sa kanilang matagumpay na laban sa court.

Samantala, hindi rin mawawala ang signature na hirit at bardagulan sa pagitan ng mga manlalaro bago magsimula ang mismong kompetisyon. 

Nang tanungin ang buong koponan para sa kanilang mensahe sa mga makakalabang team sa gaganaping tournament, confident na nagbitiw ng matapang at nakakaaliw na pahayag si Boss Keng kasama ang kanyang mga teammates.

“Sa lahat ng makakalaban namin, meron kayong chance na talunin kami—pero hindi madali. Mahihirapan at mahihirapan kayo sa amin.”

Passion and Purpose

Bukod sa pangunahing layuning mag-uwi ng karangalan at malaking tropeo sa torneo, layunin din ng Team Alfonso Siklab  na mas maipakilala at maitaguyod ang kagandahan, talento, at kultura ng Bayan ng Alfonso sa pamamagitan ng larangan ng sports. 

Sa huli, taos-pusong nagpasalamat si Boss Keng sa buong pamunuan, sa lahat ng nagtiwala sa kanyang kakayahan bilang manager, at sa mga tagasuporta na patuloy na gumagabay sa kanilang bagong paglalakbay.

Sinabi rin ng buong koponan sa kanilang mga tagahanga at kababayan na suportahan ang Team Alfonso Siklab  sa kanilang mga darating na laban sa MPPT.

Watch the full vlog below: