Cong TV and Team Payaman Go All Out to Help Genggeng Pay His College Tuition

Mula sa paghahanap ng trabaho hanggang sa pagbebenta ng mga personal na gamit, sinubukan nina Cong TV at Team Payaman ang iba’t ibang paraan upang matulungan si Genggeng na makalikom ng pondo para sa kanyang tuition fee.

Sa gitna ng nalalapit na enrollment at limitadong oras para makalikom ng kinakailangang halaga, sapat kaya ang kanilang mga naging pagsisikap upang matulungan si Genggeng na makapagpatuloy sa kanyang pag-aaral?

‘TUISSION’

Kamakailan, ibinahagi ng Team Payaman head na si Cong TV ang kanilang naging mission upang matulungan si Genggeng na makapag-enroll sa college matapos nitong amining wala pa siyang sapat na ipon para sa P48,000 na tuition fee sa San Beda College Alabang.

Isa sa mga unang hakbang ng grupo ay dalhin si Genggeng sa UnionDigital Bank upang subukan ang isang social media content role. Sa vlog, humarap siya sa mga opisyal ng kumpanya at nagpresenta ng sarili niyang marketing ideas para sa isang campaign.

Bagama’t may halong biruan ang kanyang presentation, ipinakita ni Genggeng ang kanyang kaalaman bilang Communication Arts student sa pagbuo ng mga creative concept at marketing strategies.

Kasunod nito, sinubukan din ng grupo na gamitin ang lumalaking online presence ni Genggeng upang makalikom ng pondo para sa kanyang pag-aaral. Sa tulong nina Cong at Burong, nagpresenta siya ng influencer marketing proposal sa MobileCart PH owner na si Prince Francisco at nakipagnegosasyon para sa isang posibleng brand collaboration.

Habang papalapit ang deadline ng enrollment, nagsagawa rin ang tatlo ng garage sale sa isang mall sa Imus, Cavite. Nag-ambag ang iba pang miyembro ng Team Payaman ng kanilang mga personal na gamit upang makatulong kay Genggeng, habang nakiisa naman ang kanilang mga fans sa pamamagitan ng pagbili ng iba’t ibang pre-loved items bilang suporta sa kanilang misyon.

Sa pagtatapos ng vlog, ipinakita ang pagtanggap ni Genggeng ng parangal sa The 4th Asian Pillars Awards 2026 sa ngalan ni Cong TV. Sa kanyang mensahe, binigyang-pugay niya ang sipag, tiyaga, at dedikasyon ng content creator sa paglikha ng mga video na nagbibigay ng aliw at inspirasyon sa maraming manonood.

“On behalf of my kuya Cong, maraming, maraming salamat po sa award na ‘to. And I know malaking karangalan ‘to para sa kanya. Dahil sa sipag, tiyaga, at determinasyon niya sa paggawa ng video. Hindi lang para makapagbigay ng saya, kundi makapagbigay ng inspirasyon sa mga tao, especially sa kabataan. Kabataang katulad ko na nai-inspire at patuloy pang mai-inspire sa mga bagay na ginagawa niya,” ani Genggeng.

Netizens’ Comments

Samantala, umani naman ng positibong reaksyon mula sa mga manonood ang vlog, kung saan marami ang nagpahayag ng suporta at paghanga sa misyon ng Team Payaman na matulungan si Genggeng.

@ladylyndelostrinos8963: “Kaya niyang pag aralin si Geng, eh, pero mas pinili niyang turuan si Geng sa buhay. Iba talaga si Cong TV!”

@CreativeJuices30: “Ito ‘yung sinasabing turuan mong mangisda ‘yung tao kaysa bigyan mo ng isda para rin malaman ni Geng na mahirap din kitain ‘yung pera pang enroll.”

@kathleenclarin: “Ganda ng message ng vlog na ‘to. Hindi niya i-ni-spoil si Geng para easy life lang, tinuturuan niya paano mag ipon, paano kumita, at kung paano humawak ng pera. Nasa tao na lang talaga ‘to kung paano niya i-execute ‘yung pangaral sa kanya. Good job, Geng! Nasa tamang tao ka, sa pangangalaga ni Cong sa’yo, mapapabuti ka. Ganyan ang hilahan pataas!”

Watch the full vlog below: