Yiv Cortez Shares Self-Defense Training Experience for Women’s Safety Awareness

Panibagong hamon ang sinubukan ni Yiv Cortez sa ikatlong episode ng kanyang vlog series na “Trying New Things Until I Find What I Love.”

Sa pagkakataong ito, sumabak si Yiv sa self-defense training at ibinahagi ang mahahalagang aral na natutunan niya tungkol sa pagprotekta sa sarili, lalo na para sa kababaihan.

Self-Defense

Sa nasabing vlog, ipinakita ng Team Payaman next-gen vlogger na si Yiv Cortez ang ilan sa mga pangunahing bahagi ng kanyang unang self-defense session.

Matapos ang warm-up exercises, sumailalim si Yiv sa pagsasanay ng mga basic self-defense techniques na maaaring gamitin sa iba’t ibang sitwasyon, kabilang ang pag-atake mula sa harap at likod.

Ayon kay Yiv, panimulang bahagi pa lamang ito ng programa dahil may mga susunod pang session na magtuturo ng iba pang mahahalagang skills.

Bukod sa mga bagong kaalaman, naging makabuluhan rin para kay Yiv ang makasama ang iba pang kalahok sa training.

Dito, inamin ni Yiv na inaasahan niyang mag-isa lamang siya sa klase, ngunit naging inspirasyon niya ang determinasyon ng kanyang mga kasabay upang mas pagbutihin din ang kaniyang paglahok sa aktibidad.

“Siyempre, nakakatuwa kasi may mga kasabay ako. Akala ko solo flight lang ako, eh. Kitang-kita ko kung gaano sila ka-determinado sa ginagawa nila. Kaya, na-motivate din ako,” ani Yiv.

Sa huli, ibinahagi ni Yiv ang isa sa kanyang naging realizations matapos ang pagsasanay. Para sa kanya, mahalagang matutunan ng mga kababaihan ang self-defense bilang isang paraan ng paghahanda at pagprotekta sa sarili. 

Bagama’t umaasa siyang hindi kailanman kakailanganing gamitin ang mga natutunang technique, naniniwala siyang mas mainam na maging handa at may sapat na kaalaman sakaling humarap sa mga hindi inaasahang sitwasyon.