Viy Cortez-Velasquez Plays Matchmaker in Romantic ‘Love At First Bite’ Episode

Isang panibagong serye ang handog muli ng Team Payaman vlogger na si Viy Cortez-Velasquez sa unang episode ng ‘Love at First Bite.’

Tunghayan ang mga nakakakilig at nakakatuwang mga tagpo sa ultimate matchmaking vlog na handog ni Viviys.

Love At First Bite

Sa kanyang recently uploaded video, ipinakilala ni Viy Cortez-Velasquez ang ‘Love At First Bite’ serye sa kanyang mga manonood. 

Kasama ni Viy ang kanyang kaibigan na si Andi na game na game na nakiisa sa kaniyang matchmaking activity.

Kwento ni Viviys, pumayag ang kanyang kaibigan sa nasabing aktibidad dahil handa na rin itong kumilala ng bagong tao sa kanyang buhay.

“Ako si Andi. 12 years nang single. Tapos ngayon, ready naman na [ako] kasi namimiss ko na,” kwento niya.

The Blind Date

Ang konsepto ng nasabing vlog content ay umiikot sa pagpapares ni Viviys sa kanyang kaibigan sa iba’t-ibang lalaking may kakaibang personalidad at mga hilig.

Ang mga lalaking kalahok ay mamimili ng mga putaheng inihanda ng Olive Garden upang ilarawan ang katangian o personalidad ni Andi na kanila ring pagsasaluhan ng dalaga.

Si Jerwin ang unang sumalang sa matchmaking activity kung saan hinandugan niya ng chicken dish dahil nais niyang maging healthy si Andi.

Ang sunod na kandidato naman ay naghandog ng Chicken Alfredo kay Andi dahil para sa kanya, ‘very knowledgeable’ si Andi sa mga pagkain dahil Culinary Arts graduate ito.

Chicken Parmigiana naman ang inihandog ng sunod kalahok.

“It’s very appealing, I believe na kapag ito ‘yung inihain sa’yo, it’s the best for you,” paliwanag niya.

Upang kumpletuhin ang listahan ng mga makaka-blind date ni Andi, nakiisa rin ang Team Payaman member na si Bok Magnata.

Dala niya ang isang mangkok ng salad sa kadahilanang masustansya at malinis ang pagkakagawa nito.

Para sa elimination round, napili ni Andi ang una, pangatlo, at pang-apat na kalahok na magpapatuloy sa kanilang matchmaking activity.

Binigyan din ni Viviys ng tig-dadalawang minuto ang bawat kandidato upang ipakilala ang kanilang sarili kay Andi. Sa pagkakataong ito, namaalam na si Bok dahil napili ni Andi ang una at ikatlong kalahok.

Para sa huling parte, binigyan muli ni Viviys ang kaibigan ng dalawang minuto upang makausap at mas makilala pa ni Andi ang mga natitirang contenders.

Sa huli, nakaramdam ng ‘Love at First Bite’ si Andi kay ‘Biter’ #3.

“May similarities kaming dalawa sa perception sa life, sa characteristics,” paliwanag ni Andi.

Watch the full video below: