Viy Cortez Looks Back to Life as a Sales Agent; Gives Away Brand New Car to Stranger

Hindi lingid sa kaalaman ng ilan na bago pa maging full-time content creator at negosyante si Viy Cortez ay isa itong ahente na nagbebenta ng mga sasakyan.

Sa kauna-unahang pagkakataon, muling sinariwa ni Viviys ang kanyang pinagmulan at magsilbing tulay para matupad ang pangarap ng isang delivery rider.  

Back to where it started

Sa kanyang bagong  vlog, isinama ng 27-anyos na vlogger ang kanyang mga manonood sa sa pagbabalik nito sa buhay ahente.

Una pa lang ay wala nang paglagyan ang kasiyahan ni Viy na muling maranasan ang trabahong kinagisnan.

“Nakaka-excite ‘yung araw na ‘to dahil gagawin ko lahat, ultimo pagco-commute,” kwento ni Viviys.

Suot ang kanyang uniporme, taas noong nakipagsapalaran si Viy sa matinding sikat ng araw at hirap ng pamamasahe, makarating lang sa Toyota Santa Rosa na kanyang papasukan.

Mula sa morning ceremony, orientation meeting, hanggang sa pakikipag-usap sa mga kliyente, game na game itong ginawa ni Viy bilang isang ganap na ahente. 

Bagamat 2016 pa noong huling nag-ahente ng sasakyan si Viviys, hindi pa rin maipagkakaila na gamay na nito ang mga gawi ng pagbebenta ng sasakyan.

“Kadalasan ang ginagawa ko dati ‘pag wala akong mga prospect, tumatawag ako sa mga nasa contacts ko na pwede kong mabentahan ng mga kotse.”

Bukod sa pagbebenta ng sasakyan ay tumulong din si Viy sa pag-aasikaso ng mga kliyenteng nais ipagawa ang kanilang mga sasakyan.

Maswerteng nakakuha din si Viy ng kliyenteng bumili ng sasakyan mula sa Toyota kung kaya’t masaya nitong inasikaso ang mga ito.

Well-Deserved Car

Habang naghihintay sa susunod na potensyal na kliyente, nakasalamuha ni Viy ang isang delivery rider na kanya lang inaya na silipin ang mga modelo sa loob ng kanilang showroom.

Walang pagdadalawang isip nitong pinagbigyan si Viy dala ng awa na baka matanggal ito sa trabaho bilang bagong ahente. 

“Kuya, baka pwede mo akong tulungan? Wala pa akong nebebenta, baka gusto mong tumingin ng Vios?” pagkukumbinsi ni Viy sa delivery rider na si Kuya Erickson. 

“First day ko kasi ngayon, ito-tour lang kita dun sa Vios para makita nung manager ko na meron akong kliyente. Sige na, kuya!” dagdag pa nito.

Sa gitna ng usapan ay kinukumbinsi ni Viy ang delivery rider na subukang mag-apply ng loan upang mabili ang sasakyan.

“Mapapahiya ako ma’am, kung confident lang ako na makakaya ko [bayaran]. Eh kaso hindi po talaga kaya kasi nga po nag-gagamot po [ang asawa ko],” sagot ni Kuya Erickson.

Walang paglagyan ang galak ng delivery rider nang abutan na ito ni Viy ng susi sa kanyang bagong sasakyan.

Naluluhang sagot naman ni Kuya Erickson: “Nako ma’am, salamat po kung sakali. Malaking tulong po talaga ‘to. Masayang masaya po ako.”

“Sa inyo na po ito [sasakyan]. Sa inyo po talaga ‘yan, kuya. Bigay ko po sa inyo,” ani Viy

Dagdag pa ni Viy Cortez: “At sa pagbabalik ko bilang sales agent, nanumbalik sa akin ang mga sakripisyo ko noon kung paano ko inabot yung mga pangarap ko. Ngayon sobrang saya ng puso ko na nakilala ko si Kuya Erickson at naging tulay ako para matupad naman ang pangarap ng iba.”

Watch the full vlog below: