Watch How Boss Keng and Pat Gaspar Argue in Hilarious Lovers’ Quarrel Prank

Muling nagbabalik ang mag-asawang Boss Keng at Pat Velasquez-Gaspar sa isang nakakatuwang prank kanilang kaibigan sa Congpound.

Tunghayan ang laugh trip na “Lovers’ Quarrel Prank” nina Mr. and Mrs. Gaspar sa kaibigan nilang si Nelson Mendoza, a.k.a Sonny J.

Lovers’ Quarrel

Sa bagong vlog ni Boss Keng, kinasabwat nito ang asawang si Pat Velasquez-Gaspar upang i-prank ang kaibigang si Sonny J.

Matatandaang isa si Sonny J sa mga nakasama ng Team Payaman boys sa finale ng kanilang 30-day Fitness Challenge journey noong Oktubre.

Bago umalis ng bahay para sa kanilang family day out, kinasa na agad ni Boss Keng ang kanyang plano para sa kanyang binabalak.

“Ngayon, s’ya ‘yung magda-drive sa atin. Naisip ko na pag-tripan natin s’ya. Ipa-prank natin s’ya na kunyari mag-aaway tayo sa loob ng kotse,” ani Boss Keng.

Maya-maya pa ay sinet up na ng mag-asawa ang camera sa kanilang sasakyan na tila nagva-vlog lang upang hindi ito mabuko ni Sonny J.

Pagkatapos ng kaunting chikahan, sinimulan na ng dalawa ang kanilang ikinasang plano na mag-away sa harap ng kanilang biktima.

Nagsimula ang away ng dalawa nang magsimula na si Boss Keng na magpaalam sa kanyang misis ng kanyang pag-alis pagkatapos ng kanilang family day.

“Ayun, dale mo! Alam mo, minsan lang tayo mag-ano [mag-plano] ng lakad natin, tapos gumagawa ka na naman ng lakad mo!” banat ni Pat.

Sagot naman ni Boss Keng: “May lakad kami, anong gagawin ko? Minsan lang kami mag-liga mom!”

Mas uminit ang tensyon nang mas pinalalim ng dalawa ang kanilang mga argumento, dahilan upang mas lalong kabahan ang biktimang si Sonny J.

“Minsan nakakapikon ka na,” ani Boss Keng.

Sagot ni Pat: “Akala mo natutuwa pa ako sa’yo?! Baba n’yo na lang kami papasundo na lang kami kay Lim.”

Dito na umimik si Sonny J at sinabing: “Deretso ko na, andito na eh!”

It’s A Prank

Matapos ang makapigil hiningang away mag-asawa nina Boss Keng at Pat, hindi na nito napigilang aminin na nabiktima ang kanilang kaibigan ng prank.

“Itapat mo d’yan Son, sa kanan, para masabi na namin sa’yo na IT’S A PRANK!” buong tuwang ibinulgar ni Boss Keng.

Hindi naman napigilan ng lahat na matawa sa naging reaksyon ni Nelson sa prank.

Watch the full vlog below: