Viy Cortez-Velasquez Tries Angrydobo Bento Plate and More!

Bukod sa pag-arte, isa ngayon sa pinagkakaabalahan ng aktres na si Judy Ann Santos-Agoncillo ay ang negosyo nitong Angrydobo na may branch na matatagpuan sa Taft, Manila.

Tunghayan ang pagbisita ni Viy Cortez-Velasquez sa pinipilahan ng mga ultimate Adobo lovers sa Metro Manila.

VIYsiting Angrydobo

Personal na inimbitahan ng batikang aktres at business owner na si Judy Ann Santos-Agoncillo si Viy Cortez-Velasquez sa kanilang restaurant business na Angrydobo.

Dahil sa pagsuporta ng mga empleyado ng Angrydobo sa Team Payaman, minabuti na ni Judy Ann na imbitahan si Viy upang makilala nito ang mga staff, at personal na masilip ang kauna-unahang Angrydobo branch.

Laking pasasalamat ni Viviys sa imbitasyon ng aktres na masilip ang kanilang family business at masubukan ang ilan sa kanilang mga putahe.

Isa-isang kinilala ni Viy ang mga “cast members” ng Angrydobo at sinilip ang operasyon kung paano nga ba ginagawa ang mga pangmalakasang putahe rito.

“Grabe, nakakatakam ‘yung amoy!” reaksyon ni Viy.

Nang tanungin ni Viy kung ano ang paborito ng aktres sa kanyang menu, walang pagdadalawang isip nitong binida ang kanilang Angrydobo Classic Bowl with Laing.

Napagkwentuhan din ng dalawa kung ano nga ba ang kakaiba pagdating Adobo ng nasabing kainan.

Paliwanag ni Juday, “Adobo pa rin s’ya. Iba lang ‘yung cut. Kasi si Ryan talaga ‘yung inspiration ko n’ung ginawa ko ‘yung Adobo.”

“Mahilig kasi s’ya na manipis na malutong, so ‘yun ‘yung inachieve ko. And magkaaway kami nung binuo ko ‘yung recipe, kaya s’ya Angrydobo,” dagdag pa nito.

Sinubukan din ni Viy ang Bento Plate na ipinagmamalaki ng Angrydobo, kung saan pwede ito mamili ng sariling Adobo combination sa halagang P295.

Sitaw-kalabasa, Angrydobo egg, Lumpiang Shanghai, Atsara ng Nata de Coco, Adobong Pusit, at kanin ang napiling kombinasyon ni Viviys para sa kanyang Bento Meal.

“Ay ang sarap nito ma’am. Parang kailangan wala munang pansinan,” biro ni Viy.

“Yung mga ulam na nilagay ko dito [sa menu], most of them, ‘yung pagkain na gusto ko talaga. ‘Yung alam kong gusto rin ng mga bata,” pagbabahagi ni Juday.