Muling nakuha ng Team Payaman siblings na sina Baby Tokyo at Kuya Kidlat ang atensyon ng netizens sa kanilang bagong Disney-themed photoshoot.
Sa isang Facebook post, ibinida ni Mommy Viy Cortez-Velasquez ang mga litrato na nagtatampok sa ‘big-bro-and-li’l-sis’ duo sa nakakaaliw na photoshoot bilang paggunita sa ika-limang buwan ni Baby Tokyo Athena.
Theme Concept
Hango sa temang “Aladdin”, binigyang-buhay ng magkapatid ang iconic characters mula sa animated Disney classic.
Mula sa Disney costumes ng Posh and Pearls, na-achieve ni Baby Tokyo ang little Princess Jasmine look sa kanyang blue dress, habang ang kanyang Kuya Kidlat ay nakasuot ng tiger onesie na nagmistulang si Rajah— ang alagang tigre ni Princess Jasmine sa pelikula.
Samantala, sa tulong naman ng The Baby Village Studio, ang makulay na photoshoot background at mga props ay nagdagdag sa magic ng Arabian night, na lalong nagpa-engganyo sa mga fans.
Isa ring magical Aladdin cake mula sa Doughable ang mas nagpa-espesyal sa selebrasyon.
Forever Best Buddy
Kinagawian na ng pamilya ang monthly photoshoot na nagiging daan upang i-dokumento ang monthly milestone ng kanilang unica hija. Hindi naman mawawala ang best sidekick na si Kuya Kidlat na kaniyang cutey-photoshoot buddy.
Paliwanag ni Mommy Viy, “Lagi pong bff ng Princess si Kidlat. Dahil gusto ko pag lumaki sila, mag bff sila,” ang monthly-tradition ay patuloy namang nagbibigay good-vibes sa netizens.
Inulan naman ng mga nakakaaliw na komento at pagbati mula sa netizens ang Facebook post ni Mommy Viy.
“Sa bawat cute na prinsesita, may kuya talagang kwela!”
“Ito talaga ang hinihintay ko tuwing photoshoot ni Tokyo! Cute Kidlat!”
“Happy five months baby, cute nyong dalawa!”
