Doc Alvin Francisco Educates Viewers With Severe Allergic Reaction to Skincare Products

Nag-trending kamakailan sa TikTok ang video ng isang lalaking “nagmukhang matanda” matapos gumamit ng isang skin care product.

Alamin ang opinyon at payo ni Doc Alvin Francisco tungkol sa isyung ito sa kanyang bagong YouTube video.

Severe Allergic Reaction

Sa video ng hindi pinangalanang lalaki, makikita ang malaking pagbabago sa kanyang itsura kumpara sa natural niyang mukha.

“Sa before [photo] niya, wala siyang mga wrinkles… tsaka eyebags, wala. Pero dito [sa after], tingnan niyo, oh. Parang tumanda talaga, naging lolo ‘yung itsura niya,” ani Doc Alvin matapos makita ang video.

Ayon kay Doc Alvin, nagkaroon ng allergic reaction o severe irritation ang lalaki matapos gamitin ang nasabing skin care product.

“Very dry ‘yung skin, ‘no. Very dry, magang-maga, tapos puffy… parang lumolobo ‘yung balat,” paglalarawan niya.

Signs and Symptoms

Upang magbigay-kaalaman sa madla, ibinahagi rin ni Doc Alvin ang mga sintomas ng “severe allergic reaction” gaya ng mga sumusunod:

• Pamumula ng mukha
• Pangangati ng balat
• Pakiramdam na makapal at naka-stretch ang mukha
• Dryness

Ayon sa kanya, sa una’y maaapektuhan lamang ang bahaging nagkaroon ng contact sa “triggering chemical,” pero pwede itong kumalat pagkatapos ng ilang minuto o oras.

Ipinaliwanag din ng eksperto na nagmukhang matanda ang lalaki sa video dahil sa swelling o matinding pamamaga na dulot ng severe allergic reaction.

Tinalakay din ni Doc Alvin ang kahalagahan ng “patch testing” upang malaman kung may sangkap ba ang produkto na hindi naaayon sa balat natin.

“Anumang produkto ‘yan, kahit international, kahit sobrang sosyal na brand, kahit medyo cheaper na brand, dapat nagpapatch testing,” aniya.

Red Flags

Nagbigay rin siya ng ilang “General Guidance” sa paggamit ng bagong produkto. Narito ang listahan ng mga aniya’y “red flag” na sangkap sa isang produkto:

• Amoy o fragrance
• Latex
• Heavy metals
• Formaldehyde

Para sa iba pang cosmetic allergens, maaaring basahin ito sa:

fda.gov/cosmetics/cosmetic-ingredients/allergens-cosmetics

What To Do

Sinabi rin niya ang mga dapat at hindi dapat gawin kapag nakaranas ng severe allergic reaction:

• Huwag kamutin o punasan nang madiin.
• Gumamit ng lukewarm water o maligamgam na tubig sa paghilamos.
• Uminom ng antihistamine.

Higit sa lahat, kapag nakaramdam ng pagsakit ng tiyan, hirap sa paghinga, at pagkahilo, dapat umano’y tumakbo na sa ospital dahil posibleng kumalat na sa buong katawan ang allergic reaction.

Watch the full video here: