Para sa unang episode ng “Kwentuhan sa Veranda” sa YouTube channel ni Pat Velasquez-Gaspar, inimbitahan nito ang Team Payaman member na si Kevin Cancamo o mas kilala bilang si “Genggeng.”
Ang nasabing interview ay umani ng samu’t-saring papuri mula sa netizen dahil sa kabutihang loob na ipinakita ni Genggeng para sa kanyang pamilya, sarili, at sa mga taong nakapaligid sa kanya.
Helping Team Payaman
Ikinuwento ni Gengeng sa nasabing vlog kung paano siya nagsimula sa pagbebenta sa labas ng subdivision kung saan matatagpuan ang Payamansion 2, kung saan din aniya siya lumaki.
Bukod sa araw-araw na pagaabang sa kanyang mga iniidolong Team Payaman members, sinikap din ni Genggeng na makatulong sa kanila sa pamamagitan ng simpleng pamamaraan. Isa na dyan ay ang pamimitas ng mangga para sa noon ay buntis na si Pat, paglilinis ng bahay, at pagtulong sa paglilipat ng mga gamit.
Ang kanyang kasipagan, magandang intensyon, at respeto sa lahat ng miyembro ng Team Payaman ang siyang naging susi para tuluyang makuha ang tiwala ng grupo, partikular na ni Cong TV, dahilan upang tanggapin din siya nito sa kanilang tahanan.
Giving back to the family
Ayon kay Genggeng, ang unang sweldo na natanggap niya sa Team Payaman ay ibinigay n’yang lahat sa kanyang mga magulang.
Kwento n’ya, katorse pa lang ay hindi na rin siya naka-asa sa kanyang mga magulang at siya na rin ang nagpa-aral sa sarili sa pamamagitan ng pagsusumikap sa iba’t ibang trabaho gaya ng pagiging construction worker.
Kung papipiliin sa pag-aaral at trabaho, mas pipiliin daw ni Genggeng na magtrabaho upang mas makatulong sa mga magulang.
“Paano ako makakapunta sa future kung nakikita kong nahihirapan ang pamilya ko,” ani Genggeng.
“Ganyan s’ya si Geng – instead na i-keep n’ya sa sarili, hindi, shine-share n’ya sa mga kapatid n’ya. Kasi siya ‘yung meron eh, kahit papaano,” dagdag pa ni Pat.
Samantala, nag-iwan naman si Genggeng ng payo sa mga kapwa niya kabataan: magtrabaho hangga’t kaya ngunit huwag pa rin pabayaan ang pag-aaral.
Talaga namang kaabang-abang kung sino pa ang susunod na bisita at makikilalang miyembro ng Team Payaman sa mga susunod na episode ng “Kwentuhan sa Veranda.”
Watch the full vlog here:
