Team Payaman’s Chef Enn Shares Easy but Yummy Outdoor Camping Recipes

Muling nagbabalik ang resident chef ng Team Payaman na si Kenneth Silva, a.k.a Chef Enn, para sa isa na namang katakam-takam na cooking vlog episode. 

Sa bagong video sa kanyang YouTube channel, ibinahagi ni Chef Enn ang ilan sa mga putaheng madaling lutuin para sa mga trip mag outdoor camping. 

Camping in Tanay

Noong nagdaang Semana Santa, isinama ni Chef Enn ang kanyang mga manonood sa isang outdoor camping adventure. 

Kasama ang kanyang pamilya, nagtungo ang kusinerong vlogger sa Camp Marahiya sa Tanay, Rizal. Dito nagtayo sila ng mga tent at naghanda para sa masayang outdoor trip malapit sa ilog.

Ikinatuwa naman ni Chef Enn ang ganda ng kapaligiran at ang payapang buhay malayo sa ingay at gulong nakasanayan sa siyudad.

“Parang ang sarap ng feeling dito, simpleng buhay, tahimik, walang sasakyan, fresh air yun ang importante, walang kagulo gulo, ‘di katulad sa city ‘di ba?” ani Chef. 

Outdoor cooking

Matapos pansamantalang magpahinga, inihanda na ni Chef Enn ang mga kakailanganin sa pagluluto ng kanyang mga ihahain para sa tanghalian. 

Para sa trip na ito, naisipan ni Chef Enn na magluto ng Tinolang Manok, Tuna Belly at Tuna Panga in BBQ Sauce, Longganisa with Broccoli, at Bangus Belly by Haring Bangus.  

Unang binabad ni Chef Enn ang mga tuna sa kanyang DIY barbecue sauce na gawa sa pinaghalong calamansi, ketchup, asukal, at bawang. Para mas lalong sumarap, dinagdagan pa niya ito ng rosemary at chili flakes. 

Sunod namang niluto ni Chef Enn ang Longganisa with Broccoli at ang Tinolang Manok kung saan bida ang native chicken na bagong katay pa. 

Sunod na ipinrito ni Chef Enn ang Belly Spicy na Bangus Belly mula sa Haring Bangus na pagmamay ari ni Team Payaman vlogger Michael Magnata, a.k.a Mentos. 

Watch the full vlog below: