Masayang inanunsyo ng Team Payaman power couple na sina Cong TV at Viy Cortez-Velasquez ang panibagong yugto sa kanilang buhay sa pagdagdag ng bagong supling sa kanilang munting pamilya.
Sa kani-kanilang YouTube channel, ibinahagi ng dalawa ang masasayang tagpo nang malaman nilang magiging ganap na kuya na ang panganay na si Zeus Emmanuel Cortez, a.k.a Kidlat.
Biglaang Ramen date sa Taiwan
Sa bagong vlog ni Lincoln Velasquez, a.k.a Cong TV, ipinasilip nito sa manonood ang biglaang Ramen date nila ng misis sa Taiwan.
Ayon kay Cong, naisipan nyang surpresahin ng mabilisang trip to Taiwan si Viviys dahil ilang araw na itong naghahanap ng Ichiran Ramen.
“Pupunta tayo ng Taiwan ngayong gabi! Aalis tayo ngayon, uuwi tayo mamayang gabi!” bungad ni Cong.
Wala nang nagawa si Viy kundi sumama dahil na-excite din itong muling matikman ang legit na ramen na kanya na palang pinaglilihian.
Bagong Kabanata
Samantala, sa kanya namang bagong YouTube vlog, ibinahagi ni Viy Cortez-Velasquez ang tagpo kung paano niya nalaman ang pagbubuntis sa kanilang second baby.
August 10, 2024 nang subukan ni Viy na alamin gamit ang iba’t ibang klaseng pregnancy test.
Ayon sa 28-anyos na vlogger at entrepreneur, naisipan lang nyang i-check dahil napansin nyang tila mas nagiging emosyonal sya noong mga nakaraang araw.
Agad namang ibinahagi ni Viviys ang magandang balita sa kanyang mister na halos hindi makapaniwala.
“Totoo ba? Ang bilis naman! Totoo ba ‘to?” ani Cong.
“Teka, ninenerbyos ako! May dadalhin na naman tayong bata sa mundong ‘to!” dagdag pa nito.
Masaya ring ibinahagi ni Viy ang kanyang pagbubuntis sa kani-kanilang pamilya at sa buong Team Payaman na walang paglagyan ang tuwa sa paparating na sanggol.
“Ang bahay namin… ang Congpound ay day care na talaga,” ani Pat Velasquez-Gaspar na ipinagbubuntis din ang kanyang ikalawang supling.
Watch the full vlog below:
