Isang bagong yugto ng pagiging student entrepreneur ang ibinahagi ni Yiv Cortez sa kaniyang vlog matapos niyang ipakita ang pagra-raket tuwing weekend habang patuloy sa pag-aaral.
Sa isang event na ginanap sa Canossa School of Santa Rosa, personal niyang ipinakita ang aktuwal na pagse-set up ng kaniyang booth at pakikipag-ugnayan sa mga mamimili.
Student Entrepreneur
Sa isang Facebook post, ibinahagi ng Team Payaman next-gen vlogger na si Yiv Cortez ang kanyang pagbisita sa Canossa School of Santa Rosa, kung saan siya nagtayo ng booth para sa kanyang negosyong ‘Charms by YIVA,’ na nag-aalok ng personalized accessories.
Ayon kay Yiv, bahagi na ng kanyang routine ang paghahanap ng mga maaaring mapwestuhan kada weekend upang maipakilala at maibenta ang kanyang mga produkto.
“Every weekend ako naghahanap ng pwede kong mapag-booth,” ani Yiv.
Kasunod nito, ibinahagi ni Yiv ang reyalidad ng pagne-negosyo habang nag-aaral, kung saan may kaakibat na risk dahil hindi tiyak kung magiging matagumpay ang isang event o kung sapat ang kita sa buong araw.
Sa kabila nito, patuloy niyang sinusubukan ang iba’t ibang oportunidad upang mapalago ang kanyang maliit na negosyo.
Sa gitna ng abalang araw, ipinakita rin ni Yiv ang kahalagahan ng pahinga at simpleng reward sa sarili, lalo na tuwing tanghalian. Aniya, hindi dapat puro trabaho at mahalagang maglaan din ng oras para sa sarili.
