Moving On: Von Ordoña Sells Unfinished Property; Scouts New House for Billionaire Gang

Limang buwan matapos isapubliko ang sinapit ng kanila sanang dream house, handa nang mag move ang content creator na si Von Ordoña at humanap ng bagong tahanan para sa kanyang pamilya at sa grupong Billionaire Gang. 

Sa kanyang bagong YouTube vlog, ibinahagi ni Von at ng nobya nitong si Carlyn Ocampo ang mga hakbang nila para malimutan ang masalimuot na karanasan sa pagpapagawa ng bahay.

Exposing engineer

Matatandaang noong Abril ay matapang na isiniwalat ni Von Ordoña sa publiko na naudlot ang pagpapagawa nila ng bahay dahil sa pagwawaldas ng higit 8M pisong budget ng kanilang pinagkatiwalaang engineer. 

Nanawagan pa si Von kay Engr. Mike Bote mula sa ML Builders Construction Company na noon ay naglahong parang bula tangay ang kanilang pera at pangarap na bahay. 

Hindi nagtagal ay nakausap ni Von ang nasabing engineer at inaming nagamit niya sa sugal ang perang budget sana sa bahay. 

Moving On

Sa pagnanais na tuluyuang malimutan ang mapait na karanasan, inanunsyo nina Von at Carlyn ang pagbebenta ng lote kung saan sana itatayo ang kanilang dream house. 

“Napagdesisyunan po namin na yung lupa namin na pagtatayuan sana ng pangarap na bahay eh ibebenta na,” paliwanag ni Von. 

 “Mahirap man i-let go kasi gusto talaga namin yung spot na ‘yun,” dagdag pa ni Carlyn.

Dagdag pa ng magkasintahang content creators, napagpasyahan nila ito upang tuluyan nang mag move on at gumawa ng bagong yugto sa pagkakaroon ng sariling bahay. 

Kaya naman sinimulan na rin anila ang paghahanap ng mga house and lot sa Tagaytay na maari nilang lipatan. 

Bagamat maraming nasilip na mga property, hindi pa rin nahanap nila Von at Carlyn ang napupusuang bahay kung saan kasya ang buong Billionaire Gang fam. 

Nanawagan din ang dalawa sa mga nais bumili ng kanilang lote, at maging sa mga property owners na nagbebenta ng kanilang bahay.

Watch the full vlog below: